Tarix unudulmur. İstər keçmişin, istərsə də müasir dövrümüzün tarixi, tarixə iz salanların sayəsində yenilənir. Xalqımızın şanlı tarixi çoxlu sayda qəhrəmanlıq səhifələri ilə zəngindir. Tariximizin hansı səhifəsini vərəqləsən orda xalqın taleyinə yazılmış qəhrəmanlıq səlnaməsini görürük. Vətən, torpaq uğrunda öz canını qurban verənlər xatirəyə dönüb dillər əzbəri olurlar. Onlar doğulanda kim bilirdi taleyinə nə yazılıb? Öz qanını Vətən torpaqları üzərinə çiləyən, qəlblərə köçərək milyonlarla insanın sevgisini qazanan Vətənin laiqli övladlarından biri də şəhid kapitan Vüqar Aydın oğlu Nəcəfovdur. 
Bu gün ll Fəxri xiyabanda Şəhid Vüqar Nəcəfovun  xatirəsinə həsr olunmuş anım mərasimi keçrildi.
ll Fəxri xibanda baş tutan mərasimdə şəhidin ailə üzvləri, qazilər,  yaxınları, media nümayəndələri və Vüqar sevərlərin iştirak etdiyi mərasimdə əvvəlcə Azərbaycanın suverenliyi, müstəqilliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edilib və Azərbaycan Respublikasının Dövlət Himni səsləndirilib. Daha sonra şəhidin ruhuna dualar oxunub, məzarı üzərinə gül dəstələri düzülüb. 
Anım mərasimində çıxış edənlər Müzəffər Ali Baş Komandanın rəhbərliyi ilə Azərbaycan Ordusunun qazandığı tarixi Qələbədən, bu Zəfərin qazanılmasında igid oğullarımızın göstərdiyi qəhrəmanlıq və şücaət nümunələrindən danışıblar. Sonda şəhidin adına ehsan süfrəsi açılıb. 
Qeyd edək ki, Vüqar Aydın oğlu Nəcəfov 1988-ci il avqustun 10-da Ordubad rayonunun Dırnıs kəndində anadan olub.İki bacının bir qardaşı olan Vüqar 1995-ci ildə Dırnıs kənd orta məktəbin birinci sinifinə qədəm qoyub və  2006-cı ildə həmin məktəbi bitirir.  Uşaqlıqdan hərbiyə həvəsi olan Vüqar  2006-2010-cu illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb.Dörd il burada hərbi biliklərə yiyələnən Vüqar letinant kimi bu məktəbi bitirir. Bir il müdfətində Silahlı Qüvvələrin Təlim Tədris Mərkəzində dinləyici olmuşdur. Leytenant rütbəsi ilə hərbi xidmətə başlayan Vüqar Beyləqan, daha sonra Füzuli rayonunda təyinatı üzrə çalışır. Onuda qeyd edək ki, Vüqar 2016-cı ilin 2–5 aprelində baş verən Aprel döyüşlərinin iştirakçısı olmuşdur.
Azərbaycan Ordusunun kapitanı Vüqar Nəcəfov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı ilk günlərdən döyüşə qatılaraq Füzulini, Xocavənd və Cəbrayılın azadlığı uğrunda gedən döyüşlərdə düşmənə qarşı mübarizə aparıb. Vüqar Nəcəfov oktyabrın 2-də Cəbrayıl döyüşləri zamanı Nüzgar istiqamətində gedən döyüşdə yaralı əsgərini xilas edərkən düşmənin snaper gülləsinə tuş gəlir və şəhidlik zirvəsinə ucalır.  II Fəxri Xiyabanda dəfn olunub.
Vüqar "Vətən uğrunda", "Cəbrayılın azad olunmasına görə",  "Füzulinin azad olunmasına görə", "Xocavəndin azad olunmasına görə", “Cəsur döyüşçü” medalı ilə təltif edildi.
Vüqar ailəli idi, iki övladı, bir oğlu və bir qızı yadigar qaldı. Şəhid Vüqar Nəcəfovun şəxsi əşyaları muzeyin əməkdaşı Esmira Rəhimova vasitəsilə Milli Azərbaycan Tarixi Muzeyinin Vətən müharibəsi fonduna təhvil verilmişdir.
Şəhidlər ölməz, unudulmaz! İllər keçsə də, gələcək nəsillər onları hər zaman böyük minnətdarlıq duyğusu ilə yad edəcəklər. Şəhidlərin xatirələri hər yerdə anılırsa, deməli, onlar ölməyib, ürəklərdə daim yaşayırlar.

İLHAMƏ HÜSEYNİ.